تعالوا أقولكم أحلى وصفة للطرب بأسرار و تكات صبحي كابر والبرنس
أحلى وألذ وأسهل طرب لازم تجربوه فى العيد
طرب مشوي حقيقي وصفة خطييييييييييرة
( نستخدم فيها منديل الخروف فقط )
المكونات
١ كيلو لحم ضاني + بقري ( مفرومين ناعم فيها نسبة دهون ٢٥% )
١٠٠ جرام لية ( مبشورة )
١ حبة بصل متوسطة ( مبشورة معصوره كويس جداااا )
٢ فص ثوم ( مفروم ناعم )
ملح ( حسب الرغبة )
نصف ملعقة صغيرة فلفل أسود
نصف ملعقة صغيرة جوز الطيب
نصف ملعقة صغيرة قرفه ناعمه
ملعقة صغيرة سكر
كيس بكنج بودر
منديل الخروف
( خفيف مقطع حتت زي ورق الكرنب حوالي 10 سم × 15 سم )
خليط دهن الطرب أثناء الشوي
فى طبق ( كوب ماء البصل+ ملعقتين كبار زيت +
نص ملعقة صغيرة توابل كفتة مشوية + ملعقة كبيرة صويا صوص ان وجد +ملعقة كبيرة كاتشاب )
طريقة التحضير
فى بوله نخلط مكونات الطرب ( ماعدا المنديل طبعا )
نعجن فى مكونات الطرب لمدة ( ١٠دقائق )
( نغطيها و ندخلها الثلاجه ١٥ دقيقه )
بعدها نكور كفتة الطرب كور
( بحجم كوره التنس أو حجم البيضه الكبيرة )
( بحيث يكون صباع كفتة الطرب أصغر من صباع الكفتة العادية )
نصبع كور كفتة الطرب على اسياخ خشب
( نسحب الكفتة بهدوء من على السيخ )
نقطع منديل الخروف مستطيلات حوالي ( ١٠ سم × ١٥ سم )
( مثل ورق الكرنب كداااا )
( يجب ألا يتعدي طول صابع كفتة الطرب عرض ورقة المنديل )
نلف المنديل حول صابع الكفتة علي طول أقل من حجم المنديل
( كاننا بنحشي كرنب تمام )
نضع الطرب في ( اسياخ الشوي باحكام و بهدوء )
( أو نرص الطرب على شوايه سلك )
ثم نقوم بالشوي إما على الفحم أو على الشوايه الكهربائي أو على الجريل أو حتي في صنيه فى الفرن عادي
شوية ملاحظات عالماشي
أثناء شوى الطرب يدهن الطرب بفرشاه بخليط دهن الطرب ⬆⬆⬆
البصل لازم يكون مبشور ناعم بالمبشرة ومعصور جداا
( علشان الكفتة متفكش منك )
الليه نجمدها فى الفريزر ونبشرها بمبشرة البصل
( ونضفها على اللحمة المفرومة علشان طعمها بيان فى الكفتة )
البكنج بودر ( بيخلى الكفتة هشه مش مكتومة )
يمكن استبدال جزء اللحمة البقري ( بلحمة جملى )
بعد شوي الطرب نضع الطرب على طبق مفروش بالبقدونس ( المفروم )
يقدم الطرب مع سلطة طحينة وسلطة خضراء بلدى وعيش بلدى