تحضير الشماريخ
الشماريخ عشان اللي طلبوها مني ومشافوهاش 🤎✨️
الطريقه تحت الصور 🖤
شكرآ للي بيطبلولي هأكلكوا كلكوا شماريخ
طب مبدأياً كده يختي يختي يختي
المهم يعيال الكفر اللي بره مفروض كورن فليكس مطحون بس انا مكنش عندي فا مشيت حالي بالبقسماط وبردو كان قمر ومحمد اداني 200من 100
بمناسبة يختي يختي إمبارح جالي كومنت ولد هقول أول حرفين م اسمه أحمد محمد بيقولي هو اي ال يختي يختي هو مينفعش تكتبي الطريقه من غير استظراف وزفت والله مامكمل الوصفه وهنا احب أوجه رساله لأحمد واقوله إحياة عيالك تكمل الوصفه انا حياتي واقفه من إمبارح ومعلقه محاليل وموت تلات مرات بجد متعملش فيا كده وشكرآ
طب مبدأياً كده يختي يختي يختي
كان عندي اربع شرايح بانيه فالفريزر طلعتهم وقطعتهم بالشكل ده
التتبيله عباره عن ملح وفلفل اسود وبابريكا وتوم بودر وفسوة زنجبيل وبهارات شاورما وحبة زيت ومكعب مرقه ونقلبهم ف بعض
هنحط الفراخ ونقلبهم ونسيبهم نصايه
هنجيب طاسه او حله ونحط فيها معلقة زيت وننزل ببصله متقطعه ونقلبها لحد متدبل
بعدين نزلت بالفراخ
بعدين نزلت بكوبايه الا ربع لبن ونفضل نقلب لحد مالقوام يتقل ويتماسك كويس أوي
هنا استوت الفراخ وحطيت معلقة دقيق ونقلبهم ف بعض
بالشكل ده وقد يبدو المنظر مش لطيف للبعض إلآ ان الطعم نينجا بجد وخصوصاً لو معندكيش صوصات فالفراخ بتبقي جوسي وطريه مش ناشفه وطعمها قمر وعموما الحشو إختياري
هنجيب العيش ده انا عملاه وإنتو ممكن تعملوه او تجيبوا خبز تورتيلا وهنحط الحشو وحبة جبنه وتوميه وحاولوا توزعوا ف اطراف الرغيف عشان لما نلفه رول يلزق وميفكش
هنجهز الكفر حبة دقيق وبيضتين وعليهم ربع كوباية لبن ورشة فلفل اسود وهنجيب بقسماط او كورن فليكس مطحون ونحط عليه سمسم وحبة البركه ومعلقة نشا وهناخد بالسندوتش نمرمغه فالدقيق ونغطسه فالبيض ونطلعه ننمرمغه فالبقسماط
بالشكل ده
هنسخن زيت غزير ف طاسه وننزل بيهم يتحمروا ويطلعوا وعايزه اقولكم انه مش شارب زيت خالص بالبقسماط، ومحدش يتريق ع طاستي عشان بتقمص
